Oudtshoorn Gasheer vir 14de Interdistrik Fietsrykampioenskappe
Deelnemers is gereed om aan die padresies en tydtoetse deel te neem by Highgate op Saterdag, 6 Julie. Foto: verskaf
19/07/2024
Oudtshoorn het van 4 tot 6 Julie die 14de Interdistrikte Fietsrykampioenskappe aangebied, wat sy verbintenis tot fietsrysport ten toon gestel het. Die geleentheid, gereël deur die Eden Fietsryvereniging, was deel van die Oudtshoorn Munisipaliteit se Sportfees en het steun van die Wes-Kaapse departement van sport en kultuur ontvang.
Hierdie kampioenskap is uniek in Suid-Afrika en trek fietsryers van al nege provinsies. Die Wes-Kaapse minister van sport en kultuur, Ricardo Mackenzie, het die geleentheid bygewoon en op 5 Julie aan die Kriterium-toetse deelgeneem en agt rondtes saam met jong mededingers voltooi.
Fietsryers wat op Vrydag, 5 Julie, tydens die Kriteriumtoets in Bridgton deelgeneem het, het aan die SA-Kampioenskappe meegeding.Foto: verskaf
Die kompetisie het op Donderdag, 4 Julie by die Oval begin. Vrydagoggend om 09:00 het fietsryers deelgeneem aan die Kriteriumtoets wat by VGK-kerksaal in Bonteboklaan gehou is. Die volgende dag het spantydtoetse en padrenne by Highgate aangebied.
Corné Bence, voorsitter van Wes-Kaap Fietsry en president van Eden Fietsryvereniging, het dankbaarheid uitgespreek vir die aanbied van hierdie gesogte geleentheid. Dit was die 14de jaar dat die kampioenskappe plaasgevind het en dit is die enigste in sy soort in Suid-Afrika, het hy verklaar. Hy het ook erkenning gegee aan ondersteuning van beide Oudtshoorn Munisipaliteit en die Wes-Kaapse departement van sport en kultuur.
Ten spyte van koue weerstoestande wat sommige deelnemers laat bewe het, het al die deelnemers tydens die kampioenskappe uitstekend gevaar.
(Deur Lindi Brill, Die Hoorn)