SA-fietsry kampioenskappe vir Oudtshoorn
Regs: Fietsryers in aksie by die SA Jeug Kampioenskappe van 2022 wat in Oudts-hoorn gehou is. Hierdie jaar sal dit die sesde kampioenskap wees wat deur Eden-fietsry aangebied sal word. Foto: Die Hoorn argiewe
10/05/2024
Eden-fietsry is vir die sesde agtereenvolgende keer gekies om die Suid-Afrikaanse Jeug Kam- pioenskappe vanaf 27 tot 29 September in Oudtshoorn aan te bied.
Volgens Corné Bence van Eden-fietsry en ook die organiseerder van hierdie geleentheid, is dit vir hulle ’n baie groot eer en voorreg om gekies te wees om die Kampioenskappe in Oudtshoorn te kan aanbied.
“Dit is vir ons ’n groot pluimpie, aangesien al die provinsies gevra het dat dit hier in Oudtshoorn aangebied moet word omrede dit die sesde keer sal wees wat ons dit aanbied en die standaard van die organisasie van die beste in die land is”, het Bence aan Die Hoorn gesê.
Die Tydtoets sal deur die pragtige Kango Grotte-pad loop, en ’n uitdagende dog asemrowende roete vir mededingende ryers bied.
Die Krit-toets sal by die Oudtshoorn Gemeenskapsaal gehou word, om te verseker dat fietsry die hart van die plaaslike inwoners aanraak.
Die Padresies, teen die pragtige agtergrond van die Swartberge en Kango Grotte, sal ’n unieke roete bied wat deelnemers met meer klimgeleent-hede uitdaag.
Die kampioenskappe sal kategorieë vir jong ryers in die ouderdomsgroepe o.11, o.13, o.15 en o.17 aanbied, en verseker dat die geleentheid ’n diverse reeks talent en ouderdomsgroepe aanspreek.
“Hierdie jaar is ons veral opgewonde om fietsry na die gemeenskap te bring deur gebeure in maklik toeganklike plekke aan te bied.”
“Ons glo dat deur betrokkenheid by die plaaslike gemeenskap, ons meer jong mense kan inspireer om die sport te omhels en ’n aktiewe, gesonde lewenstyl te lei”, het Bence afgesluit. (Deur Lindi Brill, Die Hoorn)