Vyf Oudtshoorn-karatekas gekies om Suid-Afrika in Indië te verteenwoordig
Vyf Oudtshoorn-karatekas gekies om Suid-Afrika in Indië te verteenwoordig. Agter van links: Zurilda Johnstone, Lo-Anne Oosthuizen. Voor van links: Esmè van den Heever, Elbie Tomé, Sion Tomé. Foto verskaf.
18/09/2026
Vyf talentvolle studente van Okinawa Goju Ryu Oudtshoorn het rede om trots te wees nadat hulle gekies is om Suid-Afrika te verteenwoordig by die 8ste World Goju Ryu Federation Kampioenskappe. Die kampioenskappe vind van 3 tot 14 Oktober 2026 in Pune, Indië, plaas.
Onder die uitblinkers is Elbie Tome, Sion Tome en Esmé van den Heever, wat reeds op plaaslike en nasionale vlak hul staal gewys het. Hul insluiting in die Suid-Afrikaanse span is ’n erkenning van die harde werk, dissipline en toewyding wat hulle aan karate wy.
Die deelname van die vyf jong karatekas plaas Oudtshoorn op die internasionale verhoog en beklemtoon terselfdertyd die groei en ontwikkeling van gevegskuns in die streek. Okinawa Goju Ryu is bekend vir sy kombinasie van harde en sagte tegnieke en vereis jare se toegewyde oefening, fokus en selfdissipline.
Vir die deelnemers is die internasionale kampioenskap ’n belangrike mylpaal en ’n droom wat bewaarheid word. Hulle sal die geleentheid kry om hul vaardighede teen karatekas van regoor die wêreld te meet, terwyl hulle waardevolle internasionale ervaring en blootstelling opdoen.
Die Oudtshoorn-gemeenskap, tesame met hul families, afrigters en ondersteuners, staan sterk agter die span. Daar heers groot opgewondenheid oor hul deelname, met die hoop dat hulle Suid-Afrika met trots sal verteenwoordig.
“Ons is ongelooflik trots op hierdie prestasie,” is die algemene gevoel onder ondersteuners. “Hulle is ware ambassadeurs van hul sport en hul dorp.”
Met die kampioenskappe wat vinnig nader kom, is die fokus nou op intensiewe voorbereiding. Die span hoop dat hul harde werk en toewyding op die internasionale verhoog beloon sal word en dat hulle met puik prestasies na Oudtshoorn sal terugkeer.
Oudtshoorn wens hierdie vyf jong karatekas alle sterkte en sukses toe met die groot uitdaging wat voorlê. (Deur GRANWILLE GOLIATH, Die Hoorn)